Miss Lou realartsrealpeople
0 0
Spread the love
Read Time:1 Minute, 18 Second

No Lickle Twang -Miss Lou Poem

by Miss Lou

The poem “No Lickle Twang” written by Miss Lou (Louise Simone Bennett-Coverley OM, OJ, MBE) can be found in her book Selected Poems: Louise Bennett

Me glad fi see yuh come back, bwoy,
But lawd, yuh let me dung
Me shame a yuh so till all a
Me proudness drop a grung.
Yuh mean yuh go dah Merica
An spen six whole mont deh,
An come back not a piece better
Dan how yuh did go weh?
Bwoy, yuh no shame? Is so yuh come?
After yuh tan so lang!
Not even lickle language, bwoy?
Not even lickle twang?
An yuh sister what work ongle
One week wid Merican


She talk so nice now dat we have
De jooce fi understand?
Bwoy, yuh couldn improve yuhself!
An yuh get so much pay?
Yuh spen six mont a foreign, an
Come back ugly same way?
Not even a drapes trousiz, or
A pass de riddim coat?
Bwoy, not even a gole teet or
A gole chain roun yuh troat?

                                                    

Suppose me laas me pass go introjooce
Yuh to a stranger
As me lamented son what lately
Come from Merica!
Dem hooda laugh after me, bwoy!
Me couldn tell dem so!
Dem hooda seh me lie, yuh wasa
Spen time back a Mocho!
No back-answer me, bwoy – yuh talk
Too bad! Shet up yuh mout!
Ah doan know how yuh an yuh puppa
Gwine to meck it out.
Ef yuh waan please him, meck him tink
Yuh bring back someting new.
Yuh always call him ‘Pa’ – dis evenin
When him comes seh ‘Poo’.

 

 

About Post Author

Rudolph Francis

Rudolph Francis discovered his keen interest in art at an early stage in life, and was intent on keeping his head high.
Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %